人民幣升值，內地人士嘅投資實力增強，地產界都預期，會多一批內地客來港買樓，帶嚟新商機。不過，發展商重未拎啲樓盤去內地推介，就已經有代理出手代勞。美聯搵到七個發展商，攞到八個盤，計劃去全國九大城市做巡迴路演。
九個城市包括深圳、東莞、中山、廣州、南寧、杭州、重慶、上海同北京，由於針對內地投資者及中港企業，去內地做路演嘅樓盤，都以豪宅居多。
咁多個發展商以恒基最積極，一共揀咗兩個豪宅盤畀美記，恒基謝偉銓話，以前都有做過類似嘅路演，內地人「隔山買牛」最着重品牌，所以今次都冇諗住要賣幾多個單位，最緊要重係建立品牌。
至於按揭，佢就話，豪宅買家一般唔使發展商操心，不過，若日後中小型項目去內地推介，就或者要安排吓。