上星期五，中環街頭碰見記者乙，問佢身水身汗走來中環做乜，記者乙話：「田少請傳媒去麗嘉酒店飲下午茶，吹吹風。」田少請飲茶，當然不能不去，否則漏咗料，點算？記者乙以為田少應該冇乜料可爆，相信係閒談性質，與記者定期聚會吓啫。
麗嘉酒店最近立法會，成為議員官員與記者見面嘅好地方。香港會都得，不過未必個個議員官員都有資格成為香港會會員，而且記者好多時着牛仔褲一度，入唔到香港會入面嘅啫。去文華ClipperLounge？好似張揚一啲，呢個係toseeandtobeseen嘅地方，與記者吹風，未必要好高調。
講開又講，文華酒店做完聖誕生意之後，就要封店一年，內部大規模裝修，完全改建，外牆聽講會加建玻璃幕牆，現時嘅房間露台會變成房間一部份，換言之，到咗二○○七年，文華酒店會變身成為一間全新酒店。二○○六年應該係高級酒店好生意嘅一年，文華如果揀二○○三年沙士時期大改建，時間會好到冇得彈。不過，冇法子啦，你估當事人識得神機妙算咩。明年大裝修，機會成本大到唔敢預測，但為咗以後三十年維持競爭力，頂住四季酒店嘅挑戰，改建裝修唔上馬都唔得。
酒店Ｍ話，今年九月開始，置地文華嘅MO吧會成為全港最chic嘅酒吧，酒店Ｍ去過紐約文華東方酒店，知道該店嘅MOBar係紐約好hip、好hit嘅名人出沒地方，置地廣場內之置地文華MOBar有希望成為香港最hip、最hit嘅地方，取代ClipperLounge成為toseeandtobeseen嘅中環勝地。有冇咁易呀，置地文華完全冇view嘅噃？
記者乙飲完茶打電話報料，田北俊話受吳光正之託，澄清吳光正唔會在○七年競選特首。真奇，以前馮國經不堪記者追問，親自出一份聲明話自己唔會選特首，釋去眾人疑慮。吳光正點解唔學馮國經出聲明而要委託田北俊代為澄清？