鄧萃雯、關智斌同梁洛施（Isabella）噚日到將軍澳出席「舊書回收義賣大行動2005」，三人喺現場呼籲大家踴躍捐「書」同買書，而善款就會攞嚟幫助廣西嘅殘障兒童，等佢哋有機會讀書。噚日現場有一位失明小妹妹Ruby即場獻唱容祖兒嘅《我的驕傲》，贏盡掌聲。
成年冇開窗
馮仁昭知道雯女一向熱心公益，而佢就話會準備執兩大箱舊書嚟義賣。唔知佢係唔係因為近日搬去漾日居，所以要清理啲舊書呢？不過雯女就唔多肯承認自己已搬屋，只係話：「我只可以話以前住村屋好慘，自從拍《金枝慾孽》之後，我已經成年冇開過個窗望海，就連落街倒垃圾都要扮到好靚先敢去。不過𠵱家我個窗就乜都望到，人哋望我唔到啫，倒垃圾都好放心。」
