要喺立法會入面搵個千杯不醉，有人話，有「黃中指」同「IQ博士」兩個外號嘅黃宜弘認第二，邊個敢認第一？當然詹培忠就有唔同意見，覺得民主黨嘅羅致光重厲害，一口就將成水杯嘅茅台送入口，真係唔怕火燒喉嚨。
黃博士響政壇一直算好飲得，係咪飲遍天下無敵手八方就唔知，不過，佢的確成日同大陸高幹以及特區政府高官嗒番兩杯。據佢形容，煲呔同肥龍呢對孖寶兄弟都好飲得。黃中指噚日同一眾行家飯局時話，佢去煲呔官邸作客時，都有同煲呔飲酒；就算係茅台，煲呔都樂於奉陪，都算唔話得，因為聽講平時煲呔多數飲紅酒，不過回歸之後，當然要識飲茅台啦。
至於肥龍，亦不時同黃博士以酒相對，好似前晚咁，黃宜弘又成為座上客，佢話從肥龍嘅說話感覺到，肥龍係好飲得。唔知係咪因為肥龍隊咗幾杯都無漏料，證明酒量好好呢？
其實做特區大官，一定要飲得吓，否則去到北京，冇人肯睬你。八方問老詹，佢就覺得煲呔同肥龍都唔算好飲得，加上肥龍怕凍，大熱天都着住件冷衫，真係好打有限。肥龍的確身體唔多好，但好杯中物，飲得幾杯係真嘅。
除咗香港官場中人，黃中指亦不時同外地朋友以酒論英雄。有帥哥之稱嘅新任國民黨主席馬英九，以前一到香港都會同佢食餐飯，嗒番杯。
相約小馬哥游日月潭
係人都知，小馬哥唔單止愛跑步，重係游泳健將，有次話好想去日月潭游水，聽到黃中指心癢癢，重同小馬哥約定：如果有朝一日，小馬哥真係去日月潭嘅話，記住喺前一晚通知聲，咁黃中指第二朝就可以即刻飛過去。
可惜，呢個咁有意義嘅歷史性時刻，都重未有機會實現；小馬哥早前又被港府拒絕入境，令兩人重未有機會再碰頭。黃宜弘重提八方，小馬哥當選國民黨主席時，大陸雖然有發賀電，但隻字不提邀請小馬哥去內地訪問，點解咁？都係因為小馬哥曾經反對反分裂法，令中方有所避忌。
黃宜弘個子都算高大，相反帳目委員會副主席譚香文就矮細小小，佢話有次立法會影合照，譚香文要企喺佢隔籬，點知佢嫌自己咁樣太矮，所以特登攞幾本電話簿墊底，等自己高啲，笑到黃中指死，原來女人對呢啲嘢真係好介意㗎。
爆料熱線：29290000、27860099
報料傳真：26239278
報料電郵：[email protected]