終於，距離開show還有半個小時，大夥兒齊集在台上試咪高峯和熱身，在導演率領下，大夥兒齊聲高喊一聲：「Goodshow!」，然後躲在後台偷看觀眾的入場情況。
也算已做過很多現場演出，以為自己不再會緊張，怎知還是覺得手腳有點冰冷，腦中混混沌沌的似是一片空白，之前一個多月排練下來的台詞走位，霎時間不知所終，大概是那種面懵懵的神情都顯露在面上吧，年輕小友們察覺了，反倒過來安撫我。
「弊傢伙，個腦好似空白一片，諗嚟諗去諗唔到第一句台詞係也？」我說。
「咁就正嘞，咁就係最佳狀態。」卓德說。「唔係啩？」「梗係係啦，若然你𠵱家特別記得邊句又或者特別唔記得邊句，到時就多數喺嗰度出錯，」阿嘉說，「好似你𠵱家咁唔記得晒就最好嘞，到時出咗場埋到位，自自然然就會啟動潛意識，將排練咗一百幾十次嘅嘢做番出嚟。」眾小友七嘴八舌，越說越像張三丰教張無忌太極拳，記得越少越好，全忘掉了反而是大成。反正很啱聽，聽聽講講也就到了開show時間。
果然一出場便跳亂了幾個舞步，幸好很快便修正過來，隨後的個半小時便沒有再出錯，反而有點越做越順，甚至有些時間忘掉了緊張，百忙中抽了一陣空去enjoy表演。台下的小朋友反應熱烈，台上台下玩得興高采烈，人越大，童心便越收越埋，開始會因為怕醜、怕瘀、怕衰，將自己越收越緊，謝謝這個兒童歌舞劇，釋放了我久未露面的童心，已有多久未嘗試過這樣唔怕醜、唔怕瘀地大癲大廢樂一番？玩得真開心！