前日出現驚險場面的建滔化工（148），昨日進一步回升，重返20元樓上。經紀黃話，一早都講咗係人嚇人，據聞即將公布的中期業績，條數重好見得人。
建滔前日一度跌落18元，但好快就反彈，昨日再升4.67％，收20.15元，成交股數595.7萬股，金額1.19億元。經紀黃話，雖然建滔今次化險為夷，但由於呢排市場對工業股的投資情緒好一般，所以建滔後市表現仍然好難講。
另外，前日股價無厘頭勁升的合生創展（754），昨日停牌搞配股。經紀黃話，聽講只係私人派對，批貨由兩三個大芬要晒，據聞其中一個係獅城國有投資機構淡馬錫控股，而且集資金額唔係細，有成10億銀咁多。
合生停牌前收報5.20元，接近52周高位，喺呢排大陸地產股備受忽略的情況下尤其矚目。
經紀黃話，合生現價相對資產淨值仍然有大折讓，加上公司早排邀得前粵投（270）老總加盟，對芬佬嚟講無疑打咗支強心針，所以儘管合生交投向來疏落，但仍值得留意。
慕容小初