恒指回落61點，期指跌得多啲，冇咗93點，低水29點。滙控（005）本月內除息1.09元，恒生（011）除息1.10元，兩隻重磅藍籌將總共拖低恒指46點，所以期指實際仍然高水16點。期指高水低水，除非幅度好大，否則唔使太着緊。
恒指C輪3939：美國聯儲局昨晚議息，加0.25厘冇乜走雞，對美股影響料屬有限，如果美股反應過敏，例如話跌百幾點，港股又跟埋，則可以細細注低買恒指C輪。喺乜嘢低位買，臨場執生可也。
下月尾夠鐘嘅恒指C輪3939，係熱門貨，對恒指反應好敏感，輪價16.6仙，溢價0.9%，槓桿率25.9倍（有效18.1倍），引伸波幅15.3%。睇啱恒指方向，升100點，揸3939賺12%，睇錯則蝕12%，注碼要克制啲。
交銀C輪9289：昨日多3隻交銀C輪登場，最旺係9289，捧場客冇前日「9輪齊發」時做即日鮮者好運。開市半個鐘頭摸頂上車，到收市時已經蝕水28%，好傷。
9289明年4月夠鐘，輪價23.8仙，溢價19.8%，槓桿率13.8倍（有效5.8倍），引伸波幅33.4%，咁嘅數據唔值得買。以交銀（3328）高過招股價唔少嘅條件，交銀其他C輪，值博率都非常低。就算正股唔跌，過多幾日，溢價縮啲，揸C輪坐盤好易變坐艇。
章盛