今日是中五會考放榜的大日子，圈中一班藝人對此亦十分關注，周潤發認為行行出狀元，只要有心任何時候都可以讀書；《殘酷一叮》主持人李克勤和梁榮忠則認為即使會考成績未如理想，考生也可以「翻叮」再試，不必氣餒；而未經歷過會考的陳慧琳則認為一切盡力而為即可，切勿給自己太大壓力。
學海無涯保平常心
周潤發：「其實行行都可以出狀元，如果今屆嘅會考生考得唔好，升唔到大學，可以學一門手藝，又或者修讀一啲專門課程，將來有機會亦可以再考過大學，又或者出嚟社會做一輪嘢，之後再讀過書都得㗎！好似我咁，𠵱家一樣讀緊英文同埋學電腦，正所謂學海無涯，鍾意讀書嘅學生，唔好將讀書同考試拉上關係，相信壓力會冇咁大，我始終認為讀書唔係為考試，係為咗增加個人知識。」
盡力而為無愧於心
陳慧琳：「千祈唔好畀自己咁大壓力，凡事只要盡力而為就得啦！我當年十四、五歲去咗日本讀書，冇考過會考，記得嗰陣時讀書成績好飄忽，有時好好，有時好差……總之後生一定辛苦，但早啲辛苦好過第時出嚟做嘢先至辛苦，因為到時一方面做嘢，一方面進修嘅話會好辛苦，後生仔辛苦係必然階段，自己走到出邊讀書，先知道出邊讀書原來咁辛苦，人哋個個講英文，但自己英文就唔係講得咁好。」
百折不撓必成大器
李克勤：「即使今年會考成績唔好，出年可以再考過，就好似我哋啲參賽者咁，接受翻叮，唔使因為唔得而失望放棄。好似『掟包韓紅』咁，雖然做唔到台主，但去到北京參加《夢想中國》全國歌唱大賽，竟然威到盡，成為現時全國觀眾投票票數最高嘅一個。
「總之大家唔好過份緊張，會考只係人生一個小階段，所謂行行出狀元，我當年中文都只係攞個D，但𠵱家已經填過幾十隻歌。我覺得考生千祈唔好怕父母，父母成日督促你，可能子女會覺得長氣，但父母咁緊張，其實都係關心你，所以最緊要坦誠面對自己父母。」
抓緊目標累積經驗
方力申：「以前我唔會同人講我會考幾多分，其實我當年會考得十二分，當時我重估自己有十八分，但因為會考前我剛剛破咗兩個香港游泳紀錄，可能太專注練水影響咗成績，入到香港大學之後我以為我實係包尾嗰個，點知畢業嗰時又唔係最差，我重要係科科都合格，我嘅例子應該可以勉勵一班會考生，應該一直朝住自己嘅目標進發，唔好半途而廢。
「成績並唔係最重要，反而當中嘅過程先最緊要，因為可以累積到一定嘅經驗。我奉勸一眾會考生唔好將成績睇得太重，成績優秀升得到預科固然好，但成績唔理想亦都可以有其他途徑繼續學習，好似展翅課程咁。考生一定唔可以氣餒，唔可以因為一次成績就放棄自己，要更加積極面對以後人生各種各樣嘅挑戰。」
採訪：卓美娟、陳月媚
攝影：陳慧安
