肥龍許仕仁即將要交出上任後首份功課，就係政改檢討第五號報告書，由於《基本法》規定○七、○八年特首同立法會選舉方法，最少要三分之二立法會議員通過先可以修改，現時有廿五個民主派喺度阻住，扣除主席范太唔投票，保皇黨數埋最多得三十四票，離三分二總共要四十票重有一段距離，即係肥龍要諗辦法撬走民主派六票，先可以穩陣通過政府提出嘅方案。
心水清、數口叻嘅政客話，民主派廿五人入面，同煲呔最老友嘅大班轉軚機會最大，提名煲呔參選嘅劉千石同「大嚿」陳偉業，亦被視為肥龍重點游說對象，呢條「大石斑」遲早上鈎，另外三票則嚟自「香麒麟」，分別係三個立會新丁譚香文、郭家麒同李國麟，三人𠵱家都擺出企硬姿態，最終會唔會畀票煲呔，唔少人拭目以待。
有民主派人士笑言，最好「大石斑」同「香麒麟」一齊轉軚，其他民主派就安樂晒。
爆料熱線：29290000、27860099
報料傳真：26239278
報料電郵：[email protected]