話咁快暑假已經放咗一大半，又係時候要準備開學的文具，今次就集中介紹一下膠紙座、釘書機同剪刀。除咗幫你包好課本外，亦為你釘好各樣文件。巿面上的款式已愈出愈多，除以有趣的外形作為賣點外，重有好多實用及多功能的設計，為你開學作好準備。
記者：曾靜茵 攝影：陳偉強、林栢鈞
ImageGirl：Bonny
Part1
盞鬼膠紙座
用膠紙最怕就係要搵膠紙頭，所以膠紙座可說是偉大的發明。
除咗避免成日搵膠紙頭的煩惱外，亦唔使另外用剪刀剪開，拉一下就搞掂夠方便。𠵱家巿面上的膠紙座講求實用設計之外，亦推出不少新奇趣怪的款式，除有大肥佬幫你頂住捲膠紙外，又有Mr.P口吐膠紙，夠晒盞鬼。
膠紙當呼拉圈
Koziol的人形膠紙座，膠紙放在其腰間有如玩呼拉圈，只要用手拉開頭與腳便可更換膠紙，備有多種顏色以供選擇。
售價：$139（b）
大肥佬實用肚腩
ZANIF的膠紙座，膠紙由兩位大肥佬用肚腩幫你頂住就已經夠晒盞鬼，加上藍綠色又夠Sharp，放喺書枱至醒神。
售價：$68（e）
口吐膠紙
Mr.P的膠紙座，放入膠紙後，膠紙會從Mr.P口中吐出，夠晒趣怪得意，另有藍色供選擇，另備有米白色供選擇。
售價：$98（e）
八爪魚夠CUTIE
八爪魚造型的膠紙座，膠紙放在八爪魚身上唔易跌出，想更換膠紙時，只要拆出八爪魚即可，附送膠紙一卷。
售價：$65（d）
七彩蝸牛仔
Scotch蝸牛仔膠紙座，備有4款顏色擇選，為你在沉重的功課壓力中醒醒神，每款均附有19mm×10.1m光面膠紙一卷，並可拆出更換新的膠紙。
售價：$19.5（c）
木製動物膠紙座
木製的大笨象與小鳥膠紙座，可拆出更換膠紙，自然的木紋表面可隨喜好掃上顏色，可讓小朋友任意發揮，為柔和的木紋加添色彩。
售價：$50（f）
操作如塗改帶
FIXON的新型膠紙座設計，操作有如現時的塗改帶，只要將膠紙貼着紙上往後拉，膠紙便可貼服地緊貼在紙上，過程中手指不會接觸到膠紙的黏貼部份，唔怕印上手指模。售價：$45（f）
Part2
釘書機省力啱手形
試過每日釘幾百份文件，釘到手都痛埋，不過現時的釘書機設計已有省力的設計，釘幾多文件都唔使怕。另外重有可以360度旋轉的釘書機，連平日課本的邊位都釘得到，亦有迷你型選擇，放喺筆袋返學用就啱啦。
超人釘書機
Koziol釘書機，高11cm，它的設計猶如你書桌上Superman，而釘書機設在他的斗篷間，不會影響其威風凜凜的神態，而其曲線身形亦啱晒手形，釘文件亦唔覺攰。
售價：$189（b）
的骰鱷魚頭
迷你型釘書機，的骰的鱷魚頭，由藍綠兩種顏色組成，設計夠細緻，加上Size細細，放喺書包或筆袋亦夠慳位。
售價：$35（d）
可360度旋轉
日本ETONA，可360度旋轉，不受釘書機的深度所限制，標準位置每次可釘20張紙，當在90度角時則可釘8張。
售價：$35（c）
輕壓即可
雞蛋形設計的釘書機，只要將它放在枱面上輕壓，便可將文件釘好，加上圓滑的特闊表面，怎樣揼、拍都唔怕整親手，每次可釘2-15張紙。
售價：$26.9（a）
放入筆袋最啱
迷你釘書機，每個長約3.5cm，最適合放入筆袋，而四四方方的造型亦容易釘，備有多款顏色選擇。
售價：$4.9（a）
可鎖緊避免釘親手
KOKUYO釘書機，備有Lock掣，合埋時可以將其鎖緊，避免唔小心釘親手，手握位以膠做更舒適，每次可釘15-20張紙。
售價：$22（f）
Part3
功能剪刀做勞作必備
返學做勞作，一把好的剪刀又點少得，現時專為小朋友設計的剪刀，備有小機關可更省力，亦有鋸齒形剪刀，幫你剪出齊齊整整的鋸齒，另外亦有安全剪刀唔怕剪到手，林林總總任君選擇。
為蝸牛戴眼鏡
Koziol鉸剪連座，蝸牛形設計夠晒Cutie，放入剪刀後，猶如一隻戴上眼鏡的蝸牛。
售價：$129（b）
迷你機關更省力
韓國的Pooky及Kiddy剪刀，手握位設有迷你的機關，開啓後剪刀便會自動彈開，使用時便更省力。
售價：$7.9（a）
吸住金屬唔會走
剪刀放在白兔仔的頭上猶如一對長耳朵，加上後面裝有磁石，可以吸在雪櫃或其他金屬的表面，咁以後就唔使周圍搵剪刀啦。
售價：$65（d）
鋸齒形剪刀
美勞專用的剪刀，刀口以鋸齒形設計，剪紙時便可剪出鋸齒的邊位，用來自製生日卡或勞作尤其合適，可讓小朋友發揮創意，適用於3歲以上小朋友使用。
售價：$35（c）
安全剪刀免被割傷
新發明的安全剪刀，其特設的安全外殼比刀刃更闊，當不小心將手指放入刀刃之間時，安全殼能避免刀刃的位置接觸手指，免被割傷。
售價：$50（f）
特長設計剪報最啱
刀刃長度有230mm的特長剪刀，用來做學生剪報就最合適，只要剪幾下，便可將需要的新聞剪下，而邊位亦非常整齊唔會一忽忽，不過亦因刀刃特長，使用時就需要特別小心。
售價：$170（f）
第一台膠紙座
於1932年，3M銷售經理JohnA.Borden設計了第一台重型的膠紙座，裏面附有剪裁刀片，使用膠紙變得更方便和容易，使其可在數秒內，膠紙已被鬆開，而尾部亦準備就緒，可作下一次使用，其設計亦沿用至今，形成今天我們日常所看到的膠紙座。
售賣點
（a）吉之島：鰂魚涌康山道2號康怡廣場南2樓（28846888）
（b）city'super：銅鑼灣時代廣場b1地庫（25062888）
（c）中南圖書文具有限公司：旺角西洋菜街2Q地下（23842430）
（d）Vivishop：旺角潮流特區122號舖（21368178）
（e）OLALA：鰂魚涌康山道2號康怡廣場南吉之島2樓（25691381）
（f）LOG-ON：九龍塘又一城UG層01舖（22655333）