豆斗邱淑貞不嬲都鍾意去中環鏞記食飯，前日familyday，馮仁昭又喺鏞記撞到豆斗，原來佢同老公沈嘉偉一家大細走咗去鏞記開餐，食到十一點幾先走人。原本豆斗個菲傭拖住大女落樓，但沈嘉偉一見到有記者喺度，即刻抱起大女，然後教個女點樣避開記者鏡頭。大女聽完老竇番說話後雙手掩面，重伏喺老竇膊頭度，真係醒目！
忙綵排舞台劇
至於抱住細女嘅豆斗，喺走出酒樓門口之前，特登幫細女拉起件衫頂帽，不過唔知係咪因為佢匆忙得滯，搞到頂帽甩咗，於是俾記者影到正。馮仁昭見細女眼仔睩睩，同阿媽成個餅印咁，好鬼可愛。
另外，黃凱芹前晚同工作人員去翠華茶餐廳食消夜，睇見佢個樣好殘，原來佢忙緊綵排舞台劇。
