豬鏈球菌疫情暫時靜咗落嚟，冇變成沙士翻版，煲呔都算好彩，唔怪得煲呔上星期同班傳媒解畫時，可以講到自己咁英明神武、反應神速，重「成功說服」四川停止出口豬肉嚟香港，令香港避咗一劫。
但係，心水清嘅自由黨立法會議員方剛踢爆煲呔嘅講法。方剛同八方講，明明係中央七月二十八號出手，下令禁四川豬肉出口，如果煲呔游說得咁「成功」，點解嗰日唔出嚟講清楚？點解煲呔當日唔出嚟公開宣布，香港都同時禁埋豬肉呢？要等到同啲傳媒吹風先講，咁樣真係俾人覺得，好似事後先至作個講法出嚟解畫，好似同事情發生有出入喎！
自我感覺反應神速
一向溫和、為人謙謙君子嘅剛哥，都咁唔滿意煲呔嘅講法，睇嚟煲呔今次只係自我感覺反應神速，實情係快過慢三拍嘅老董少少。剛哥重孖叉煲呔，處理涉及同內地有關嘅負面事情上，感覺上真係唔多主動，冇乜吸取沙士嘅教訓，好似令人覺得要等內地同中央講咗先得，而唔係將市民嘅健康擺喺優先。
剛哥話，其實啲市民一早都唔食豬啦，市場已經冇咁嘅需求，都唔明政府點解唔乘機禁埋佢？又唔係話啲豬由陸路、坐大飛走私嚟，好難禁，全部豬都係由關口入境，要禁真係易過借火，但政府連檢疫措施都冇乜加強，又冇驗豬鏈球菌，真係唔明！
小當奴為老闆消毒
煲呔最忌俾人話佢似老董咁慢三拍，剛哥咁講佢梗係唔同意啦！煲呔嘅新聞秘書小當奴就幫煲呔消毒話，其實自四川爆發疫症以嚟，政府真係日日有做嘢，唔係乜都冇做，有記錄可以查，佢哋早喺二十五號已經兵分兩路，成功游說人哋四川唔好出口豬肉嚟香港，𠵱家冇事發生，都證明煲呔做嘅係啱㗎，絕對唔係符碌。
傳真︰2623-9278
電郵︰[email protected]