港股市底真係好強，調整幾十點後，已經跌唔落，以接近全日高位的15108收市，升57點，成交只有187億元。有一點要注意的是，期指尾段突然轉強，由低水而轉為高水，大市極有可能會再抽一轉，先會出現真正的調整。
今個禮拜有成80隻新輪發行，大部份明年1至2月到期，未來兩三個月，相信大市會繼續造好，方便發行商「散貨」，佢哋一路套戥，一路散貨，大戶出貨，愈出愈高，冇問題，只要窩輪到期前一兩個月，大市掉頭回落，佢哋又勁賺一鋪。
散戶熱衷炒輪，雖然長炒必輸，但短炒捉正正股個升浪，分分鐘可以賺幾十個巴仙。噚日，中國人壽（2628）隻短命C輪3740就高收0.495元，大升32%，溢價重有成1.5%。朝早上車，尾市收割，真係賺到笑。國壽收6元，升0.10元，筆者早幾日推介，當時股價5.75元，預測PE20倍計，股價可見6.35元。
中油開車上望1.74元
另外，3隻有機會私有化的石油化工股，吉林化工（368）已上到2.20元，中油（香港）（135）噚日踩盡油，搶到上1.62元收市，大升8%，成交更大增到1.4億股，短期上升目標維持1.74元。至於上海石化（338），衝咗一段，就在2.90元水平消化，睇下幾時輪到佢。
生命科技（1180）有消息，話會有大動作，而且會做到好好睇睇。生命科技由7仙起步，已升咗唔少，喺8.9仙至9.2仙消化完，噚日又再抽上高收10仙，成交大增到2億股，係8個月以來嘅最高紀錄，睇走勢，照度上去，目標係12仙。
呢輪賭股有番生氣，而生命科技所發展的即時百家樂系統，聽聞會好快搞掂，呢個系統，開得密（平均每45秒開1鋪），賭客每人用1部終端機，唔會俾人影響同騷擾，重可以下注「Jackpot」；至於賭場亦好有利，一來可地盡其用，二來開得多，收益自然更豐厚。即時百家樂發展成功，應該會受賭場歡迎，而生命科技抽佣亦會好可觀。
除即時百家樂外，生命科技進軍高增長項目，聽聞好快又會有好消息。生命科技市值約2.7億元，若每年賺到5至6千萬元，PE亦僅5倍而已。
郭兆誠