本港發展商賣樓，興送呢樣送嗰樣促銷，估唔到呢股風氣𠵱家都吹到過濠江。澳門筷子基林茂塘區爹美刁施拿地大馬路嘅典雅灣，就送買家車位同八八折優惠。代理美聯張一輝話，上個月至今，已經賣出咗兩成單位，平均每日接到五十個查詢。
典雅灣地下係舖位，一樓同地庫係停車場，其上係住宅，共九十伙，面積一千零九十八至一千五百九十一呎，平均定價每呎大約千四蚊，預期到明年第四季可以入伙。聽講，冇幾耐之前宣布準備贈送嘅八個車位，名額已滿，美記話，可以同買家爭取到送電單車位；至於八八折優惠，就重未滿額。
電郵地址：[email protected]