遠東發展紅磡單幢樓東海雅園，得一百零四伙，一手重有四十個，但聽日已經有批銀主貨拍賣，為數十一個。
負責拍賣嘅卓先話，原業主當日借齊一二按，實際攞出嚟嘅本錢有限，見個價回咗就唔肯要，銀行惟有收樓。今次單係拍賣呢個盤，目的想引起市場注意，而公司接到唔少查詢，問吓有冇相連戶或者可以打通做相連戶。
呢十一件銀主貨，五百一十六至六百一十四呎，開價百一萬至百三萬。買一個又得，成批買都得。
睇番發展商嘅一手貨，每呎四千二至四千三，舊年三月首度開盤，呎價四千。但今年一月，二十六樓五百二十呎二手單位，成交價得一百四十五萬，呎價唔使二千八。唔知發展商有冇諗住低價回購番啲？