常言話，英雄莫問出處，財經事務及庫務局局長馬時亨未必算係英雄人物，但係做咗高官，都算光宗耀祖。佢噚日返去佢細個喺度大嘅北角區巡區，同書局街啲舊街坊話當年，又返去舊居美輪大廈懷舊，回憶吓板間房嘅日子，又真係覺得日子飛逝。
噚日陪馬局長一齊巡區嘅有東區區議會副主席王國興同議員胡經昌。局長先去巡咗區內一間銀行，又去睇馬寶道行人專用區。
馬局長又感於會考快放榜，勉勵大家盡力而為，永不言棄。考得好要繼續努力，千祈唔好讀死書，要活學活用；考得唔好亦唔使放棄，只要努力，亦有出頭機會。至於佢自己，讀新法書院時家貧到十六蚊學費都冇錢交，好彩王老闆（王澤森）畀佢遲啲交學費，後來會考三個良，入埋港大㖭。
傳真︰2623-9278
電郵︰[email protected]