明天是阿女會考放榜的大日子，我做媽的當然緊張啦，大小事情都要為她打點，不容有失。若她可以原校升讀中六固然好，但萬一要出去撲學校，身為廿四孝媽咪的也要事先做足準備，沒理由坐視不理，除了煲煲靚湯，重可以做啲乜?!
記者：陳家珍、麥思明 攝影：林栢鈞、楊錦文
Models：BeckyLee、陳太
鳴謝：東華三院健康理財家庭輔導中心
專家放榜通勝
其實放榜前夕，家長比子女更緊張，即使子女平時成績不錯，都怕「一時失手」。身為父母，到底可以做啲乜講啲乜？怎樣才不會講錯說話，令子女有雙倍壓力？東華三院健康理財家庭輔導中心的梁主任醒你幾招：
講多錯多……
1.放榜前先打擊子女士氣。
2.將子女成績與他人比較。
3.翻舊帳，責備子女懶惰。
總有你鼓勵……
1.家長可先搜尋升學指南，供子女參考。
2.鼓勵子女相約同學在家研討升學計劃，互相扶持。
3.向子女表達家庭財政狀況，明白家庭能負擔的底線。
4.若家長又不善言詞，可靜坐子女身邊給他們無形的支持。
5.與子女作多方面溝通，忌只集中在放榜話題上。
有嘢想講？
東華三院東華關懷熱線：25480010
路人甲乙丙 都為你打氣
放榜小錦囊
明天有11萬多名會考生放榜，要撲學校要跟人爭便要與時間競賽，數齊隨身攜帶物品，切忌倒瀉籮蟹。
錦囊1
唔係去飲免多餘飾物
面試時，第一個印象最重要，衣着以整潔樸素為主，毋須過份隆重像飲宴，輕便Casual，一件白恤衫已是不錯。耳環、手鏈等便可免則免。若平時有化妝習慣，這天也應盡量避免，或塗少許遮瑕膏精精神神便足夠。
錦囊2
充裕現金$2,000最穩陣
檢查八達通餘額、帶備足夠輔幣搭車、現金或支票簿支付學校報名費等。免卻浪費時間到銀行提款機排隊，攜帶現金$2,000或以上最保險。記着，明天是要爭分奪秒呀！
錦囊3
證件相片影多幾份冇甩拖
預備好透明File，放好履歷表、獎狀、證件相等，記得影印好數份，用夾夾好，明天有需要時即時整套出示，顯現你子女有條理的性格。亦要記得帶備證件相，最好預備定一打。
錦囊4
面試忌背答案
到新校申請入學，可能即場會來個簡單面試，面試最重要準時，表現淡定，儀容整潔。回答問題時要自信望着對方，切記不要背誦標準答案。部份學校會選用英文作面試語言，因此不妨參考一下工具書，避免因怯場而表現失準。
錦囊5
省時包的士$120/小時起
子女前途大過天，花多少少錢包一部的士最省時方便；而且司機熟悉不同院校位置，省卻自行搵路時間。
的士同業會（23622337）
收費：繁忙時間（9:00am-11:00am）$150/小時 非繁忙時間$120/小時（2小時或以上）
港九電召的士車主聯會（27600455）
收費：$120/小時
香港的士中心（25747311）
收費：$120/小時
錦囊6
紅金唔啱Feel回歸黑髮
平時染髮、Highlight整個頭又金又紅的，面試前最好先到髮型屋染回黑髮。唔夠時間？起碼也要用噴色劑噴回黑色。
錦囊7
後備電池 長氣都唔怕
手提電話在放榜前要充好電，當日可能要經常打電話詢問學校收生情況、向家人或朋友互通消息。帶埋後備電池，就萬無一失啦！
錦囊8
柔韌紙巾不可少
Touchwood講句，成績不如理想已經喊濕幾包紙巾。再在猛烈陽光下四圍走，不停流汗，呢個狼狽樣又點去面試？所以，隨身帶備幾包堅韌紙巾不可少。
錦囊9
乾糧充足最緊要
要四處撲學校，隨身帶備麵包餅乾等乾糧，以備不時之需。最好帶定一排朱古力，可即時補充熱量。水也不能少，在酷熱天氣下周圍走，不斷流失水份，飲多啲水可免中暑。
錦囊10
放榜手冊冇佢唔得
除了帶備填表要用的順滑流暢的原子筆外，搵學校更需帶備一本天書。放榜手冊內有齊了各區學校地址、電話及上年收生情況；想另謀出路，書中一樣附有進修、海外升學、求職等資料。冇一本傍身又點得！
一句定生死?!
講得
「你都好畀心機，相信你都滿意呢個成績啦！」
「我都知道你好擔心，慢慢嚟啦，我會支持你。」
「世上好多嘢都掌握唔到，會考只係人生其中一個階段，失敗可以再嚟過㗎！」
「其實除咗讀中六可以升到大學，重有好多途徑，慢慢揀，唔使咁擔心！」
「唔好同人哋比較，最緊要盡咗力，媽咪爹哋就開心。」
唔講得
「睇你都唔得㗎喇，唔使旨意我會幫你呀！」
「我唔可以再供你讀書，你自己諗辦法啦！」
「平時咁懶，成日掛住打機，𠵱家考唔到，抵死啦！」
「你睇隔籬小明考5、6個A，叻過你好多！」
「中文科考B（03），差少少就拎到A，唉，真唔抵！」