本欄於上星期三講及「當紅分析師」Ｆ，以為寫得幾白吓，好多人都會知道分析Ｆ係邊位。點知有幾位讀者來函詢問：「分析Ｆ是誰」，諗咗一輪，都係無謂開估，以免太多人去搵分析Ｆ。Ｆ老哥已經夠晒紅，夠晒忙，無謂再向佢增添額外工作。分析Ｆ從來冇在雜誌報紙發表文章，只替證券公司寫分析報告，在地產界係人都識。
一位自稱「一位阿太讀者」追問美國樓市爆煲危險，左丁山聽咗Ｆ哥講咗幾句，正是識少少，可扮代表。美國房地產市道不斷上揚，升到格林斯潘都驚埋。近來美國流行ARM（adjustableratemortgage），供樓人士可以自行選擇每月供款幾多，好多人只係供息唔供本，一味等屋價升，好多人將間屋按上加按，完全係「賭期貨」格局，只要（一）繼續加息、（二）失業率上升、（三）經濟放緩，是但一件事發生或者三件齊來，美國啲供樓人就會陷入困境，分析Ｆ認為加州會首當其衝。至於幾時會爆煲呢？分析Ｆ冇講到，佢只係話已經到咗危險水平。左丁山就大膽講多一句，美國十年國庫債券孳息率已經慢慢爬升，去到四點三厘水平，比一個月前嘅三點九一厘，已升咗10%。格林斯潘就係希望增加短期息率（預料今個禮拜會加息四分一厘），從而迫使長息上升。呢位老人家好有耐心，一於慢火煎魚，大家唔好以為佢對樓市再無影響力。
如果美國樓市唔掂，對香港有乜影響？分析Ｆ認為影響甚微，因為香港人供樓負擔仍然處於低水平，經過九七年一役，買樓供樓都十分小心，冇美國人咁興奮，中小型樓宇會企得硬淨，反而豪宅已經去到差唔多咯，𠵱家入市買豪宅，水位有限。左丁山又加多一句，香港幾位最精明嘅投資者如吳光正（賣連卡佛大廈）、羅嘉瑞（分層出售朗豪坊）、馮永祥馮耀輝（賣寶珊道舊豪宅）都成為賣家嘅時候，你估普通人會唔會計數叻得過佢哋四位？