昨日經紀陳提到高寶綠色（274）勁sell將廢棄車胎及塑膠產品再造為環保能源的生意，原來佢哋唔止向證券界人士推介，昨日重向傳媒介紹。雖然小初唔識及唔知呢門生意掂唔掂，但隻股噚日反應唔錯，升咗5.2%，收0.81元，成交股數2948萬股，金額2358萬元。
睇嚟經紀陳講得啱，只要有水有古仔，隻股就會有得炒。
另外，經紀黃問小初，有冇留意建滔化工（148）喺下午出現一幕驚心動魄的場面？隻股昨日早市走勢已經麻麻哋，下午失驚無神跌落至最低18元，好彩收市時升回19.25元，但仍然大跌7.45%，成交股數664萬股，金額1.28億元。
經紀黃話，建滔自上月初以每股22.25元配股後，股價腳仔軟軟，一早已跌穿配股價，加上泰興（389）效應仍在，基金對高負債的工業股存有一定疑慮，而建滔配股所得款項，正好係用嚟減債，所以更加引起投資者擔心。
基於唔少人有戒心，在人嚇人的情況下，昨日終於出現一幕驚險場面。
慕容小初