財政司司長唐英年嘅兩周暑假話咁快就放完，佢老哥噚日精神奕奕返回政府總部，有人笑唐唐，成日掛住同老婆仔女去度假，輸畀煲呔都冇法啦。不過，八方又唔係咁睇，所謂人各有志，家庭同事業同等重要，唐唐家庭行先，亦無不可，而煲呔則兩個仔大晒，可謂冇後顧之憂。講番唐唐，原來佢個大仔今年都讀中五，不過，喺國際學校讀，應該唔使考會考，但係都要諗吓去邊度升學，今次旅遊之後，可能已決定咗去美國抑或去英國升學。
離開咗一段時間，唐唐要追番吓啲最新發展，特別係佢老竇公開叫佢返屋企幫手，唔知佢使唔使認真諗諗。因為唐老先生同唐老太太一向望子成特首，忽然咁講，一定係收到勁料，莫非就係煲呔有排玩是也？
傳真︰2623-9278
電郵︰[email protected]