報紙話「希慎」要三越搬走,重新裝修百貨店為商場,以增加租值。如果三越關門,日本四大百貨店大丸、松坂屋、三越、崇光(今日之崇光,非日本人經營之崇光),曾雄霸銅鑼灣區,盡皆煙消雲散。香港地舖租金大升,日式百貨公司莫不望風而逃,嗱,西友賣咗畀新鴻基,西武(廸生集團擁有)遷出皇室堡,以後日式百貨公司會喺香港收晒檔。
地產K話畀左丁山聽,希慎好似唔止裝修商場咁細眉細眼,直情係要將全幢興利大廈拆卸重建。呢幢大廈建於七十年代末,設計不如理想,趁今日地產好市,拆咗佢,重建為智慧型商業大廈,實會脫胎換骨,增加租值,譬如將地底與地鐵打通,建一條隧道橫跨軒尼詩道,地鐵高興,希慎更高興,𠵱家地鐵只通往崇光,到三越要上街面兜彎,所以崇光店零零舍舍旺過三越好多,拆建興利大廈,改建埋停車場,開條隧道嘅話,呢座新大廈點會唔升值?
地產K又話希慎滿肚密圈,改建興利大廈之後,就會動禮頓中心腦筋,呢幢大廈已經老化,唔符合二十一世紀需要;搞埋禮頓中心,夠未呢?未夠,地產K預測:「我覺得SunningPlaza大有改善空間,將寫字樓拆卸後,改建成為銀座式商業大廈,地面留番個空曠大廣場,四圍種樹木,內設酒吧食肆,必定煞食到暈,包保一星期七日,日日夜夜都會有車水馬龍之感!」
希慎係銅鑼灣大地主,希慎道一帶,盡是希慎物業,目前雖然收租收得幾好,但如果學似置地咁,將啲舊資產不斷翻新、重建(如遮打大廈、舊文華酒店),更可以maximise希慎手上物業嘅經濟價值。地產K唔知收到風吖還是一味靠估,講得有道理。