眨吓眼暑假已經過咗一半，唔少家貧嘅家長同大使呻，莫講話冇錢畀仔女參加暑期活動，連為仔女買開學用品嘅錢都要周圍問朋友借，部份綜援家庭同大使講，社會福利署雖然有發放津貼畀佢哋仔女買新學年嘅書簿同校服，但想有多餘錢再買啲文具就好困難。
歡迎孩童提出申請
為咗減輕貧窮家庭喺仔女開學上嘅經濟壓力，蘋果日報慈善基金「童夢成真」行動每年會預備一個滿載開學文具嘅禮物包，送畀弱勢家庭嘅細路，應付上學需要，當中包括鉛筆、間尺、筆盒、文件夾及單行簿等。舊年，六歲升讀小一嘅豆豆，便喜獲贈一套粉紅色嘅卡通文具套裝，開心不已。
大使呼籲凡有興趣索取開學文具嘅孩童，可向蘋果基金提出申請，數量有限，先到先得。
基金接獲申請後會進行甄選，經審核符合資格後，將盡快安排送畀大家，另善長亦可透過捐款支持，查詢詳情，請致電暖流熱線：29908688。
「童夢成真」專戶捐款編號：C0121
暖流熱線
電話：29908688
傳真：23702192
電郵：[email protected]