近日劉浩龍的派台新歌《ShutUpBaby》反應不俗，這首歌令他想起三位十分重要的女性，分別是婆婆、媽媽及妹妹，日前他抽空到尖沙嘴選購門閂、咕𠱸和吹氣梳化給她們。
劉浩龍新歌《ShutUpBaby》內容指很多情侶或夫妻相處長時間後，女方會變得十分囉唆。劉浩龍藉此歌向一眾女性表明，假若女方可以少一點囉唆，男方會更加愛她們。
激勵妹妹發憤
新歌亦令劉浩龍想起三位十分重要的女性，就是婆婆、母親和妹妹。日前劉浩龍抽空到尖沙嘴選購禮物給她們，買了兩個咕𠱸、一張吹氣梳化及一個門閂，事後他說：「媽咪返寫字樓工，成日要坐喺度做嘢，買個咕𠱸等佢坐得舒服啲。而阿妹考完會考，我想佢繼續升學坐定定溫書；婆婆屋企道門有啲問題，咁就買個門閂畀佢囉。」
劉浩龍近日見妹妹努力讀書，感欣慰說：「阿妹可能見到我雖然等咗咁多年依然冇放棄到，𠵱家事業可以叫有少少成績，媽咪都話係我影響到妹妹發憤，做阿哥嘅都好開心。」
為何三個重要女人中獨欠緋聞女友何韻詩，劉浩龍表示在朋友中何韻詩、徐濠縈及謝霆鋒對他非常重要，他表示與阿詩在事業低潮時互相扶持，現在二人在很多事情上都心照不宣。至於徐濠縈，劉浩龍說：「佢真係好錫我，當我好似細佬咁看待；至於霆鋒同我嘅成長環境好似，大家都係喺女人堆中長大，好多嘢佢都好明我嘅諗法。」
採訪：胡比 攝影：葉君海
服裝提供：MarcbyMarcJacobs
場地提供：LCX 髮型：Jay（Orient4）