屯門市中心物業以屯門市廣場及時代廣場較為人熟悉，炒賣個案多，但原來周邊一啲冇咁出名嘅住宅，一樣有投資者覬覦，轉手獲得利潤都唔錯。
喺屯利街嘅新都大廈，A座高層四室，五百八十八呎，投資者舊年用七十六萬八買入，稍為裝修之後放售，終以一百零二萬賣出，每呎一千七百三十五，比同類單位高出半成，獲利二十五萬二。
祥益地產張才權話，新都大廈造價比市中心樓價平一成至一成半，但實用率就高好多，有八成，市中心樓多數只得七成實用，所以都吸引到投資者。
張才權指出，新都大廈𠵱家有十五個單位放售，屬於投資貨嘅佔三個，有啲係今年初用八十零萬買返嚟，由於呢啲貨有裝修，叫價一般高達一百零五萬至一百一十萬，比業主貨嘅九十幾萬為高。