相信對於NDS玩家，《JUMPSUPERSTARS》絕對係年度期待大作，一見到呢班陪住大家成長嘅《少年JUMP》漫畫主角，基本上都已經走唔甩，加上格鬥遊戲喺NDS上面係第一次出現，自然吸引到一班鍾情格鬥Game嘅玩家，難怪一出街已經成為機迷熱話！
記者：梁瑋瑜
呢幾日喺網上面NDSNewsgroup裏面討論緊嘅都離不開《JSS》呢隻Game，風頭一時無兩，綜合咁多玩家同埋記者自己意見，都覺得呢個遊戲對於熟悉《少年JUMP》漫畫嘅玩家會比較得心應手，不過相信香港機迷，大部份都同時係日本漫畫迷，所以《JSS》繼續好賣，都會成為不爭嘅事實。
戰鬥畫面大家好熟悉，上面係戰鬥主畫面，下面Touchscreen可以Call人幫拖！
JAdventure過關送人物
先講吓「JAdventure」模式，玩家會進入JWorld，喺JWorld入面每一關都有唔同Mission，除咗格鬥遊戲裏面不可少嘅將對手KO之外，有時會係打爛啲牆、或者同對手鬥打爛最多寶箱咁，玩家記住每一關開始嘅時候睇清楚過關條件，唔識日文嘅玩家喺呢度可能會比較吃力，其實要過關最緊要熟悉唔同人物嘅長處，然後作出調配，用適當人物玩就會事半功倍。
成功過關之後可以追加新人物，亦都會有漫畫格仔送，方便大家之後用嚟砌Deck。其實「JAdventure」裏面嘅Mission都算易過，不過每一次過到之後又會加入新嘅Mission，例如要求更快時間咁，等大家可以繼續挑戰，亦都可以開更多人物。
自組Deck最強組合
《JSS》嘅精華其實唔係格鬥部份，而係砌Deck部份，有玩開遊戲卡嘅朋友應該好熟悉呢個自己砌嘢嘅系統，喺《JSS》裏面一樣可以利用每次過關追加嘅新人物同埋漫畫格仔，只要砌啱人物同對白，就可以拼出Battle、Support同埋Help角色，自組一個最強Deck出戰，Battle人物主要用嚟作戰，而Support角色就係助攻，Help就用嚟補血，同一個人物配上唔同嘅漫畫格仔就會變成唔同用途，不過呢一度真係好考大家熟唔熟漫畫，而且識日文就着數好多！
喺作戰過程裏面，只要㩒下面Touchscreen，就可以更換Battle人物，或者派出Support角色，反應慢少少都唔得，非常之刺激㗎！至於「通信Play」模式，就係可以同其他2-4玩家無線對戰，而「Battle」模式就係同電腦對戰，玩完「JAdventure」又可以周圍同朋友玩吓，相信大家都唔使考慮太多，可以即刻入貨喇！
《JUMP》最強人物大晒冷
喺《JSS》登場嘅漫畫包括《龍珠》、《狐忍》、《Onepiece》、《男兒當入樽》、《HUNTER×HUNTER》、《JoJo之奇妙冒險》、《幽遊白書》、《IQ博士》同埋《死亡筆記》等等，全部都係90年代至到近年嚟炙手可熱嘅漫畫，大家就算冇認真咁睇過，都一定會認得佢個樣，甚至知道佢哋有咩必殺技。《JSS》大致分為「JAdventure」、「通信Play」同埋「Battle」三個模式，喺「JAdventure」模式裏面，一開頭以悟空、路飛同埋鳴門為主要最好打角色，一路過關就會有更多強勁人物出場，大家如果想知道會有咩人物會出場，就要去官網度睇吓（ http://www.nintendo.co.jp/ds/ajsj/index.html）。
DreamStore（25753285）
灣仔東方188商場2樓256號舖