大藍籌、國企、紅籌升咗一大輪，上星期終於見到二三線股陸續有搞作。
澳門賭業股已經熱炒幾日，另外有啲股仔無厘頭勁升，但有啲則有古仔sell，例如好一段日子冇乜點炒嘅高寶綠色（274）最近公布，明年將在香港開辦一項新業務，將廢棄車胎變為可用燃油、柴油、汽油及天然氣新業務，預期在明年中開始運作，重話日後將成為主要收入來源。
高寶綠色幾年前上市，主要係做家居與護理產品，收尾又搞埋化妝品生意，家陣廣告都不知賣得幾行，之前重搞過環保生意，去咗星洲上市。小初聽到隻股講到咁勁抽，問經紀陳點睇？
經紀陳話，其實高寶綠色早排已經密密會晤證券界人士，勁sell呢一門生意，但佢唔係科學家，點會識得睇，淨係知道有水到，隻股就自然會炒得起。
高寶綠色上周五升1.32%，收0.77元，成交金額699萬元。
慕容小初