今次訪問了腫瘤科莫醫生，令我感覺到每一架車、每一個人也有很多面。正如他現役愛驅萬事得RX-8，4門4座無B柱，合乎家庭需要之外，配備250ps雙轉子引擎的RX-8，不論速度同操控都達一流水準，狂踩7000至9000轉，曾跑越無數路上對手。從他的好勝心、鬥車經驗，我感受到這位醫生在工作上一定會係妙手仁心，但一講到車，用妙手狠心來形容都不為過罷！
記者：戴維浩
攝影：陳陶鈞
首批抵港行貨
先開前門，再開後門，RX-8就是這樣有性格，開合、乘坐必要按部就班，小心翼翼。一頭竄進座艙，我和攝影師的乘坐空間剛好足夠而已，莫醫生話：
「兩個男人前後坐，係迫啲㗎喇！」
後座底部係油缸，車頂極低，中央車軸凸出，乘坐空間有限。
「對於當時一個啱啱離咗婚，又要湊住兩個細路嘅男人，佢係一個非常好嘅選擇。」
任職腫瘤科的莫醫生以前都用開Sedan、SUV，通通賣掉後，就專心一意買跑車。
「跑車通常都係兩門嘅，載住兩個小朋友出入唔多方便。朋友介紹，只有呢架係有4門4個位。2003年10月買入，應該係首批到港嘅行貨車。」
行逾3萬公里嘅「新車」
環看車廂四周，簇新至一塵不染，車內無任何擺設、個人裝飾，中軸上只有紙巾盒而已，不禁打趣道：
「醫生，你部新車嚟㗎？」
「都行咗3萬幾公里，重新咩?!」他笑說。
醫生個人講究efficient，就連紙巾盒都不太願意放入車廂，不過有時卻需要用，實非意願。
「就算係油站送畀我嘅紙巾，我都唔想放，恨不得揼咗佢，總之，我就好討厭紙巾啦！」
3波開始見真章
1檔開車，雙轉子引擎（2-RotaryEngine）傳來低鳴，出大路，飛快躍升2、3檔。
「部車1波有Lagging（遲緩），上到3波先會發力！」
13BRENESIS雙轉子引擎精采之處，在於高轉輸出非凡，早段轉速攀升還算順滑，扭力略嫌微弱，中段部份3、4波，踩油指向7000轉，始見跑車真章。
送子女返學做熱身
一路上大埔公路，250ps雙轉子引擎，與6前速手波合作無間。醫生周日例牌路線，大埔公路出吐露港，送女兒往上水學騎馬，沿路直而少彎，勁好飆！要不然送兒子往赤柱寄宿學校，淺水灣道、大潭道彎多路窄，又是一練身手的好機會。不過這兩轉只是熱身，每當孩子離開後，好動的爸爸便會露出車手本色。
試問一部紅色RX-8怎會不招惹其他好鬥之士？
被撩鬥車一定赴約
「我都俾好多GTR撩過！鬥車？點會唔鬥？」
大如GTR、靈巧如MiniCooper，莫醫生一概不放過！某日，一出獅子山隧道，鮮黃色MiniCooper作出挑釁，切線，爬頭。醫生就話：
「一於踩油追，唔爬頭，唔罷休！」
Mini靈巧，穿梭車群中，縱使RX-8力氣更大，亦佔不上絕對優勢。到了沙田出口，直至馬場一段直路，醫生一連串動作，推3檔，離合器半放，狂踩7000轉，半秒才放離合器，再踩油，5秒內，勝負立分。不過這種鬥車心態，實在不敢苟同，此時此刻問自己，究竟係筆者心態老了，抑或這位好動爸爸還未長大？
肌肉型車頭「好靚」
到了馬場會所，邊談邊拍照，醫生對於車身造型滿意，似乎男人應有的車應該如此。
「車頭係Muscular嘅，其他地方相當協調，原裝車已經好靚！」
車側散熱口仍加了側鰓，因為出車時已經有，心態完全係「用得唔好嘥！」。不足之處，來自車尾。
「個尾翼比較『鬼祟』，原廠有個加大碼嘅就得體好多！最唔滿意就係個尾廂，睇車時又話可以放得落兩個高爾夫球袋，點知放1個都係僅僅夠！」
幸好，長期後座乘客女兒沒有傳來不滿之聲，後座具安全感，長途車更有愜意，畢竟，一部高性能跑車好壞，並不是取決於後座意見罷！
開車門要有次序
車內絕對簡約
MazdaRX-8Specifications
引擎：654cc×2轉子
馬力：250ps/8500rpm
扭力：22kgm/5500rpm
傳動：6前速手波，後輪驅動
懸掛：（前）雙搖臂（後）多連桿
制動：（前）透氣碟（後）透氣碟
輪胎：225/45R18
尺碼：4430×1770×1340mm
軸距：2700mm
車重：1310kg
0-100km/h：6.8秒
極速：250km/h
車價：$428,000
查詢：28931112（萬事得汽車）