梁雨恩（Cathy）近日與師姐官恩娜（Ella）灌錄合唱版新歌《全世界失戀》，Cathy更在無意中發現Ella原來有一怪癖，就是喜歡赤腳走進錄音室錄歌，Cathy還自爆有錄音前恐懼症，幸身為過來人的Ella教路助她克服難題。
官恩娜師妹梁雨恩近日推出新歌《全世界失戀》，Ella甚為欣賞，為此唱片公司安排二人灌錄一個合唱版，然後放在Cathy新唱片推出。
「投入啲舒服啲」
今次Cathy更請來二十多位中學同學為她與Ella的合唱版作和音，認真熱鬧。為灌錄新歌，Cathy與Ella近日頻頻到錄音室練歌，無意中竟被Cathy發現Ella的怪癖。
Cathy興奮地說：「原來Ella錄音嗰陣唔鍾意着住對鞋，咁啱嗰日佢冇帶拖鞋換，所以索性打大赤腳，認為咁樣會投入啲舒服啲，真係聞所未聞、見所未見！」
大嗌開聲有效
Cathy又說：「Ella比我有經驗，好多時一齊做嘢佢都好照顧我，其實我每次錄音嗰陣，我都會有錄音前恐懼症，梗係覺得周身唔舒服，上半身僵硬，好怕自己唱唔到，開唔到聲，又好怕人睇住我唱歌，後來同Ella傾開偈，先知道原來佢初初錄音都有咁嘅毛病，Ella教我一味放聲大嗌，當身邊乜人都冇，嗌多幾嗌就會冇事喎。結果我試佢呢個方法，果然有效！」
