劇集《我的野蠻奶奶》前周平均有逾二百萬名觀眾，「鐵嘴雞」胡杏兒及「不留名」黃宗澤自然開心。但劇中嘴不饒人的杏兒，日前與黃宗澤玩跳over時，竟縮成蝦米般頻頻喊驚，令「不留名」終於在老婆面前威番次。
無綫劇集《我的野蠻奶奶》自播出後收視勢如破竹，前周平均收視高達三十四點，即約有二百二十三萬觀眾捧場，劇中飾演「野蠻奶奶」的汪明荃、「鐵嘴雞媳婦」的胡杏兒和夾心人「不留名」黃宗澤，出盡法寶大鬥法，搞笑連場，為萬家觀眾帶來幾許笑聲。
做軟皮蛇
日前杏兒和黃宗澤到將軍澳接受記者訪問時，即場耍花槍互相戲弄，其間又大玩跳over，由健壯的黃宗澤做肉躉讓輕磅的杏兒跳過當然沒問題，但到杏兒扮肉躉時，她卻恐慌至縮成蝦米，擔心黃宗澤跳過自己時飛腳無眼，更真情流露放聲高叫：「喂！好驚呀！」即使對方成功跳過，杏兒仍喊驚道：「嚇死我呀！真係好驚㗎！」黃宗澤聞言表現得沾沾自喜，十分鬼馬。
提到《我》劇中的婆媳矛盾關係，黃宗澤笑言現實中不太可能發生在自己身上，他說：「做我女朋友首先要接受我屋企人，如果我遇到一個好似劇入面嘅阿媽同老婆，一定要搬開，避之則吉，大家最好住得好近或者樓上樓下。」問黃宗澤若愛上野蠻女友又如何？他笑說：「我未必會搵野蠻女友嘅，但黎彼得講過，話最好做軟皮蛇，咬又咬唔入，打又打唔死，等佢無所適從，當冇事發生囉，如果唔係，火星撞地球死梗啦。」
自詡浪漫
而杏兒則自言雖然口齒伶俐，但絕不愛吵鬧，她說：「我諗多數會由得奶奶自己鬧，我就走咗去，唔會同野蠻奶奶鬥。」問她在拍拖時會否向男友撒野？杏兒說：「我一定唔會係好溫柔嘅女仔，不過有時都幾浪漫㗎，雖然都會暗中野蠻吓，但我都係講道理嘅人。」
採訪：朱倬誼 攝影：仇志德
服裝：SistyrMoon（二人牛仔褲為私物）
髮型：KelFung@Hair
