上周五，美國經濟數據靚，利率又有上升壓力，美股因此而第2日回落。港股可能因此而再跌一啲，但市底好，整固之後有機會彈番上去，趁低位買C輪，走短線。
恒指C輪3939：恒指C輪3939上周全周上升16%，由0.154元上到17.8仙，候調整至16仙左右上車。3939原屬冷門貨，上周四與五忽然大增至350球與427球，因為數據合理而成為炒家落手對象。數據合理，就會跟隨恒指升跌，應升則升，應跌則跌，唔會出現恒指升隻輪唔升，炒家谷氣現象。
3939喺下月尾到期，溢價1.1%，槓桿率24.2倍（有效16.5倍），引伸波幅16.5%。
新地C輪4904：樓按利率提高之後，樓市已經習慣咗，地產股再升。新地（016）見過82元新高，上周五收81.20元，1周升95仙。等機會再回到80元邊邊，揀C輪短炒。
主角對象係4904，明年1月初夠鐘，溢價4%，槓桿率18.3倍（有效10.5倍），引伸波幅18.5%。新地C輪10月前到期者，溢價比較低，但交投似有還無，入貨出貨俱難，炒家將戰場移到明年嗰批C輪。3906年底到期，交投稍遜，但溢價與槓桿率唔錯。
章盛