二十四歲的謝霆鋒情路曲折，舊愛王菲結婚了，張栢芝又投奔「老外」，但他強調自己依然迷信童話愛情故事；對於人生起跌，他揚言有錯會認，打我會企定，再敢怨天尤人必遭雷劈，難怪歷遍風雨的霆鋒驀然回首，會深覺錯與對都是人生經驗，即使跌下來也要慢慢再爬上去！
起跌篇：不憂多變只怕空白
過去兩年，謝霆鋒試過紅透半邊天，也曾試過事業直插谷底，對於人生大起大跌，日前他在中環接受訪問時說：「幾好呀，我自己最驚係十年、二十年後，回望自己嘅人生一片空白，呢個係第一驚。第二驚係驚自己浪費咗每一分每一秒。」
衰嘢都試過晒
霆鋒說：「有一排我一個人望住屋企塊鏡，會問謝霆鋒去咗邊×度？早幾日同朋友食飯，佢哋話：『阿仔，你兩個月冇出過街食飯啦！』我開始怕去多人嘅地方，但我覺得生活踏實，啲人都覺得我開心咗，自己都領略到少少人生真諦，今時今日嘅謝霆鋒，十萬人唔信都好，我望住塊鏡問心無愧咪ＯＫ囉！今時今日謝霆鋒重怨天尤人，不如攞住支高爾夫球棍被雷劈！」
他續說：「我今年先得二十四歲，啲人話：『仔，衰嘢你都試過晒啦！』但廿四歲就一生人咪好大件事？高處未算高，低處未算低。我上過法庭、入過監獄，去過蒙地卡羅攞《世界音樂大獎》，同啲國際級歌手一齊，呢個真係幾極端。第日我會同個仔講，你老竇幾飽滿，慢慢講你聽呀，唔係一片空白㗎。」
早料到Fans離棄
問霆鋒當時會否擔心爬不起而被fans離棄？他搖頭說：「畀我係外界都會咁啦，一下子咁，大家會好失望，我唔可以排除自己有錯有疏忽，但我有錯會認，打我一定企定！」
鬧出滿城風雨後，霆鋒並沒想過退出娛樂圈，他苦笑說：「冇資格唔做呀！我○九年至約滿，重爭公司錢，係七位數字，唔止我一個爭錢㗎，但得我一個夠膽講出嚟。」他續說：「順便提吓時下年輕人，入行係不歸路，唔係睇住有乜嘢樓、有乜嘢女朋友，係真係鍾意音樂，鍾意做娛樂圈嘅嘢，有咁嘅決心至好考慮入行。」
