謝霆鋒年前發生的頂包案，因妨礙司法公正罪成，候判期間被覊留十四天，當時事業如日方中的他在一夜間變成階下囚，但霆鋒揚言在獄中沒有被人白眼，他說：「我入去好平心靜氣，有個阿sir同我講，話我係第一個入嚟瞓覺最安樂、瞓得最冧嗰個，因為我知疏忽在乜嘢。抵囉，殺一儆百，鬼叫你任性上咗機咩？係人生一個過程嚟嘅。」
涉打人弊過坐監
履行社會服務令後以為一切重新開始，想不到去年尾在北京拍攝劇集《小魚兒與花無缺》期間，卻發生內地演員王伯昭被打事件，涉及這宗官司的霆鋒當時也感到很無奈。
他苦笑說：「呢件事重弊過坐監，發生件事之後，Mani（經理人霍汶希）見到我，我都未喊，佢已經想喊，我望住個天第一次講出口：『謝霆鋒今時今日有乜嘢攞多咗，我畀番晒你啦。』」
好多嘢重未睇通
霆鋒續說：「我唔想再坐過山車，好攰呀！有好多嘢我重未睇得通，重有好多嘢不受控制，要傷害我、罰我可以，鬧我×街仔、冇×用！冇所謂，我會爭氣，但我唔容許你鬧謝賢、狄波拉兩個，生個咁嘅×街仔囉！」
霆鋒表示現在《小》劇在內地收視有佳績，中央台也多次找他參演奧運宣傳活動，所以王伯昭事件是否對他存有影響，霆鋒謂也不須多作註釋，他還說：「其實今時今日睇番，有好多係經驗，謝霆鋒被人噓，要慢慢躝番上去，二十八樓跌落嚟，亦要諗方法爬番上去。」