二十位候選港姐噚日出席喺海運大廈舉行嘅「名表展覽會」，眾佳麗透過問答環節宣傳香港，口齒伶俐嘅12號張允芝脫穎而出，獲大會頒贈CarlF.Bucherer鋼帶手表。
噚日商場迫滿圍觀嘅市民，其中4號真田裕美同8號葉翠翠重有fans舉牌支持；20號張莉莉就收到小fans送嘅大型熊公仔，13號李思雅雖然冇fans，但就有阿爸、阿媽同婆婆送花撐場。
兩周後決勝負
有人撐場嘅佳麗，自然吸引記者包圍影相，成功搶鏡啦！冇人撐場嘅佳麗咪惟有坐冷板櫈囉！
馮仁昭喺娛樂圈見過唔少未紅嘅歌手搵fans撐場造勢，不過估唔到今時今日選港姐都要有fans！𠵱家距離港姐選舉重有兩個禮拜，睇嚟班佳麗都要鬥餐飽嘞。
