新聞故事唔止老番追讀，前輩賓架亦睇得津津有味，前輩Ｔ已經年近八十，佢話上一代中國人（比佢自己更老一啲），包冇呢啲事。前輩Ｔ話：「老人家娶三妻四妾閒閒哋，有幾個老婆，就唔會強迫大婆做事啦。」我等小輩唔敢出聲，因為我哋邊度有呢啲經驗吖。福建Ｃ大大聲講：「我哋鄉下舊時，邊個有錢佬唔納妾㗎，男人到咗四十歲，大婆會主動叫佢納番個妾侍呀，否則大婆好冇面。」小輩等又吃咗一驚，點解唔納妾，老婆會冇面？福建Ｃ話：「梗係冇面啦，嗱，第一，男人四十唔納妾，梗係冇錢冇地位，咁樣大婆何來面子，嫁咗個窮郎喎；第二，有錢而唔納妾，可能係有心無力，老婆又覺得冇面；第三，男人娶妾侍回家，大婆可以點佢做嘢，為自己斟茶，出街有人跟住後面，幾威！反而男人在外面養埋一兩個，大婆更覺得唔抵。」
哦，原來福建鄉下有此傳統，不過福建Ｃ只係講吓啫，佢自己身家大把，又唔見佢夠膽納妾！時代唔同咯，新一代講究男女平權平等，邊個敢搬出古老鄉俗嚟娶妾侍？香港地都冇幾個啫。靚師奶Ｔ聽見我哋咁講，立即杏眼圓瞪，手指指咁話：「你哋班男人咪想學福建鄉俗，好多男人短炒變長揸，有排衰。」
咦，「短炒變長揸」係炒股票術語，靚師奶日日炒股票，何出此言？靚師奶話：「我哋炒股票，本想炒上車落車，賺幾個價位搵餐茶，立即鬆人。點知一買就跌，唔肯止蝕，於是揸落去，越揸越跌，咪當係長期投資囉。一個男人最初以為食散餐，玩吓玩吓，點知後來甩唔到手，女人上到寫字樓追米飯，幾乎聲震中環，你話死唔死吖。」原來靚師奶講說話嗒落有骨，都係無謂畫公仔矣。