中環民園麵家早前光榮結業，唔少街坊趁最後機會去食多碗麵，順道見多呢個大牌檔一面。店主李先生透露，日前信和地產職員搵佢，提議民園搬過海喺九龍奧運站奧海城復業，灣仔馬師道有個業主亦主動搵佢。
不過李先生話捱咗幾十年，難得有個機會休息，故暫時未有決定，佢又話曾粗略問個舖租行情，旺區一個六百呎舖位，要成四萬蚊租一個月，加埋裝修同請夥計，開新舖最少要百幾萬，佢坦言若有咁大筆錢不如買股票，「買晒中電，一年四季有息收，重唔使咁辛苦。」
唔少市民唔捨得民園，林生話當局通知佢今個月十八號前要清場，之後就成個檔口拆走，佢拎走一啲搵食架生，個「大牌」則交返畀牌照部。中西區區議員甘乃威向當局建議，保留民園個檔口，將成個大牌檔搬入博物館，等市民可以緬懷呢種香港獨有飲食文化。
爆料熱線：29290000、27860099
報料傳真：26239278
報料電郵：[email protected]