中國IT界人才輩出，相信冇人異議，但如果話中國IT界強於製造年輕富豪，想必更多人認同！新鮮人辦係有中國Google之稱嘅百度（Baidu），呢間公司嘅靚仔創辦人李彥宏（Robin），一夜之間身家漲至近十億美金（逾七十億港紙）兼夾為國爭光，完全示範咗咩叫做中國月光，比外國月光更圓！
百度以二十七蚊美金招股，美國時間周五喺納斯達克掛牌，先以六十六蚊開盤，股價全日最高見過一百五十一個二，收市一百二十二個半，單日升咗三百五十巴仙，除咗舊年Google上市以嚟首隻首日掛牌突破一百蚊大關嘅新股，重成為有史以來美國上市外國公司首日表現最好嘅一隻，震撼整個華爾街。
身家超過70億
三十七歲嘅李彥宏副身家有幾多呢？根據上市資料顯示，呢次上市佢以每股二十七美金賣咗二百五十萬股百度，套現咗五千二百幾萬港紙，𠵱家佢重揸住七百二十七萬股百度（約百分之二十二點四股權），市值約六十九點五億港幣，夾埋超過七十億！根據三月《新財富》公布嘅內地富豪榜計算，佢經已超越咗排第五嘅網易老闆丁磊（身家係七十億人民幣），成為祖國五大富豪呢！
有「業界帥哥」之稱
講到呢度，自然係要起吓李彥宏個底。資料顯示，佢喺山西陽泉長大，八七年入北京大學讀信息管理（當時叫做情報學），九一年畢業，同年聖誕赴美國紐約州立大學讀電腦科學碩士學位。九九年底，同佢個校友徐勇一齊創立百度，有「北大才子、業界帥哥」之稱，絕對係才（財）貌雙全。可惜佢已經係名草有主（重要係已婚）嗰隻！
八方勉勵各位姊妹唔使灰心，祖國咁多勁人，嗱嗱聲北上搵間大學讀番幾年，就算幾唔鍾意都好，都要揀啲計數呀、IT呀之類嚟讀，話唔定一個唔覺意眾裏尋他千百度，財色兼收做埋首富太太呢！
爆料熱線：29290000、27860099
報料傳真：26239278
報料電郵：[email protected]
