特首曾蔭權前晚九點幾喺中環鏞記大廈食完飯行出嚟，罕有咁冇打煲呔，淨係着住件白恤衫，平民化到差啲認佢唔出。不過見到佢身後着晒西裝嘅保鑣全程護住佢，再加埋架冇車牌嘅特首車，就係人都認得出佢。喺酷熱警告下，特首都熱到要除咗件披兼唔打煲呔啦！
講起煲呔，噚日港台肩負政府喉舌任務，畀煲呔讀出《香港家書》，家書內容乏善可陳，較特別係煲呔提到星期三會考放榜，鼓勵成績唔理想嘅考生唔好氣餒，更重提上屆歐冠盃賽果，話冠軍利物浦最初被睇低一線，而且落後AC米蘭三球，不過利物浦喺極度劣勢下絕地反擊連追三球，最後更憑互射十二碼反勝對手奪冠。
八方以前好少聽聞煲呔鍾意睇波，前特首董建華就肯定係球迷，而且係利物浦躉，上屆利物浦捧走歐冠盃，點知老董卻因腳痛落台，煲呔今時今日提起利物浦，攞景定贈興呢？
爆料熱線：29290000、27860099
報料傳真：26239278
報料電郵：[email protected]