首長國際（697）上星期三，話就可能增持聯營公司一事進行初步磋商，呢壇消息，可以繼續炒。首國04年度（12月止）純利高達2.79億銀，年度中，首國旗下從事設計、製造及銷售鋼材嘅聯營企業「首秦」，為首國貢獻3890萬元溢利（首國上年底增持首秦到51%，但無控制董事局組成權，所以視為聯營）。要咁睇，首秦上年中先開始營運，就算扣埋前期使費3160萬銀，仍有純利5490萬銀，即係話，首秦成盤靚仔數，有餘未盡，到05年度先會充份反映。
保守計，首秦05年度純利起碼1.1億銀，首國應佔純利5599萬銀，單係呢瓣聯營，已經佔首國04年度總純利20%。
咁啱得咁蹺，首國呢期磋商增持嘅聯營，又係從事設計、製造及銷售板材業務，首國未來盈利爆炸力，有機提升。首國兜咗成半年嘅圓底形態呼之欲出，破頸線0.73元，向上量度目標0.9元，即現價（0.71元）1/4番。
冠軍銀彈豐厚
冠軍科技（092）牛皮咗成半年，上星期開始異動，現價1.23元較半年低位1.14元升咗不足8%，重係低殘，又講兩點：第一，冠軍05年度中期（12月止）純利2.3億銀，05年度中期純利，係04年度純利2.96億77%，墊底效應好強。
第二，冠軍到上年底資產值44.8億銀，家陣冠軍市值不過15億銀，折讓66%。再講，冠軍同期手頭現金8.17億銀，總貸款講緊不過1億銀，淨現金高逾7億銀，銀彈認真豐厚。隻股啱啱上星期三突破短期橫行頂1.22元，博上番1年高位1.44元，NAV折讓60%，重有大把折讓水位。
錢雋