提起暗殺，首先就會諗到同政治有關，冇錯！《叛譯者》係一套政治題材電影，講述當權者為鞏固權力，可以不惜一切，殘害國民之餘，甚至乎搵殺手暗殺番自己！皆因「利」字當頭，雖然呢套電影已經被某啲國家列入禁播名單，但導演薛尼波勒（SydneyPollack）依然冇放棄，重成為史上第一套電影取得聯合國批文，進入紐約聯合國總部大樓進行拍攝，議政廳、傳譯員工作室、國家元首休息室等皆成為電影場景，機會難得。再由金像導演、影帝及影后級人馬坐鎮，淨係數場景及演員「卡士」，絕對唔睇唔得！
記者：陳國輝
Profile
片名：《叛譯者》
發行：年代影視
導演：薛尼波勒
主演：妮歌潔曼、辛潘
片長：108分鐘
級別：IIA
追蹤恐怖分子必睇位
監生打死勁核突
由於暗殺非洲總統嘅陰謀被蕭菲亞聽到，於是恐怖組織立刻派人去殺佢，可惜最後俾佢逃脫，而殺手更受到組織懲罰，活生生俾人打死！
踢波小孩變恐怖分子
剛見面嗰陣，呢名非洲街童只不過喺球場入面踢波，但係當美國人出現嘅時候，佢哋立即拎起機關槍向對方掃射！
暗殺事件局中局
你估佢真係想暗殺非洲總統嗎？其實係做場戲！呢名黑人受非洲總統顧用，總統「暗殺」自己嘅目的只係想混淆視聽，令人以為係恐怖組織報復啫！
午餐肉炸彈
蕭菲亞為追尋男友下落，冒險衝上一架匿藏恐怖組織首領嘅巴士，向對方查問；最後落車時，有人將炸彈塞喺罐午餐肉入面，造成汽車爆炸，兇殘無比！
全程恐怖式暗殺
身為國家級政治要員，最驚就係俾極端主義者暗殺，呢套電影入面，好似巴士炸彈襲擊、會議槍擊案等通通出現過，而導演更為咗將暗殺過程真實地演繹，重喺電影入面埋下好多伏線，只要有細心留意每一個畫面，一定揣測到當中玄機！例如，舉行聯合國元首會議嗰陣，守衞如此森嚴，點解重會有人能夠帶槍入去呢？答案其實喺片頭約10分鐘已經揭曉，因為金屬探測器曾出現短暫故障，同一時間一名扮成職員嘅人剛巧推着架手推車（槍收埋喺車架入面）經過；呢個鏡頭雖然只有短短兩至三秒，但萬一Miss咗，恐怕就好難明白整套電影嘅邏輯。
特別收錄加料結局
《叛譯者》雖然唔似其他DVD咁玩雙碟裝！但單碟加大量Bonus內容，勝在資料充實搭夠！其中「AlternativeEnding」就係必睇位，因為《叛譯者》嘅普通版結局，淨係提到蕭菲亞將非洲總統嘅陰謀揭露出嚟，之後就冇晒下文；但係Bonus版就交代得完整好多，講述非洲總統事敗後受到聯合國調查，並喺蕭菲亞面前承認晒自己嘅罪行，令父母及男友沉冤得雪。另值得一睇係刪剪片段，其中一幕會發現杜賓位女拍檔，原來一直暗戀緊佢，喺普通版入面包你睇唔出㗎！
年代（27873612）
