自由黨主席田少田北俊，噚日約會政治版記者，喺中環麗嘉酒店茶敍，講吓下個禮拜上京之行，席間蘭西問到佢公司萬泰嘅九龍塘畢架山峰，佢即刻非常興奮，話呢個係全日最開心嘅問題，然後就話，當年啲地冇人吼，佢同拍檔用咗唔使六億，執咗呢幅地返嚟，𠵱家賣得非常好。佢又透露，當年另外都買入咗「一大堆」土地。雖然樓盤好賣賺大錢，但田少就大歎𠵱家靚地難求。
對於政府話，冇錢起添馬艦地皮做政府總部，田少隨口指出，地皮可以起一百萬呎，每呎建費二千蚊，都係二三十億啫，點會冇錢呢。睇嚟，佢對地產市道非常熟悉，數口重好精㖭。
講番畢架山峰塊地皮，係○二年四月，由萬泰、信和同華置一齊喺拍賣場買入，當時用咗五億七千萬投得，樓面呎價一千八百九十三。三間公司股權平分。樓盤共建一百九十七個分層單位，同埋二十二幢獨立洋房，𠵱家賣咗一百三十間，包括五幢洋房，已經套現二十五億。
電郵地址：[email protected]