噚晚睇《頭條新聞》，見到林超榮，佢今次講「外判」同講「海灘」，應該冇乜惹火內容，亦唔會將「風趣建築於別人痛苦」上。記得上次佢笑煲呔結果俾人剪咗，引起小小風波。
八方都寫過〈港台剪片剪到人心寒〉，講呢個風波，隔咗兩日，就收到港台電視部公共事務節目總監胡永杰來信。呢封信，係八方見過嘅無數政府部門（港台算唔算係政府部門呢？）嘅信函中，寫得最好的其中一封。睇完封信，又聽聞胡先生快要離開呢個崗位，都覺得可惜。
媒體要透明度高，八方最歡迎當事人澄清。
胡永杰嘅信，有三段，可以抄兩段畀各位睇。「《頭條新聞》製作十多年，已形成某些風格，譬如含蓄、對事不對人、不把風趣建築於別人痛苦上、幽默而不挖苦、諷刺而非謾罵等，是節目基本的表達手法，也是節目把關人所依據的原則。希望大家能接受《頭條新聞》這種風格。」
「我有一個夢：就是有一天大家都認同港台節目的編輯取向和信任她的編輯過程，那麼，一切陰謀論都會不攻自破。」
傳真︰2623-9278
電郵︰[email protected]