唔少三四線股繼續無厘頭勁炒。經紀陳話，唔好以為有啲股仔炒得勁及成交大就以為有料到，個別股份只係炒家興致到，出嚟露兩手而已，噚日升幅仍有1.1％的奧瑪仕（959），成交金額高達3.17億元，但佢仍然堅持並無內幕故事，重話如果小初唔信，可以再等多一陣，當發覺冇炒作消息時，就知道佢無講大話。
不過，經紀陳亦話發現近排真係有炒家做緊嘢，而且重係創業股，呢隻就係金屬電子交易所（8161），隻股早排已經炒作過一輪，藉口就係無耐前公布聯同1間澳洲公司合作，在大陸發展一個全國性的彩票營運統一平台，公司亦會改名做華彩控股。
經紀陳又話，據聞近排唔少證券界人士見過呢間公司高層，覺得sell緊嘅概念都幾動聽，重話計到幾年後盈利有成幾億銀咁多，但因為始終係創業板股，投資者信心唔大，覺得有一定風險。
金屬電子交易所昨日升9.09％，收1.20元，成交股數1987萬股，金額2323萬元。
慕容小初