東方海外呢間輪船公司，噚日公布半年業績，繼續賺大錢，兩個高層出嚟見記者，唔止蓮子蓉咁面口，更加毫無尷尬情況。
點解話會尷尬呢？咁就要講吓古仔。記得東方海外上一次公布業績，係今年三月十一日，星期四。呢一日就係佢哋大老闆董建華辭任特首嘅大日子。
八方當日都有去東方海外業績會，董建成冇現身，其他高層三緘其口，嗱嗱臨講完兩句就收工，有關董生的問題一概唔評論。當時有人懷疑董生通咗水，事關東方海外慣常在禮拜五公布業績，今次提前一日，時間又安排到剛剛好在阿董見記者之前。世事邊有咁巧合呢。
又有人話，阿煲呔「七年惶恐」呢句說話，有啲唔啱，證據就係東方海外。佢哋嘅股價八年升咗十倍──真係十倍，連年賺大錢。噚日張成績表繼續靚爆鏡，盈利高達三億零九千萬──係美金（唔知點解講心繫祖國，又用美金計數呢），每股半年派息十二美仙，等於九毫四子港銀。董生自己名下有成八千九百萬股，單係今次收息都袋八千幾萬，莫講話腳痛，打跛隻腳都唔使愁啦。
何苦日日七十一呢？
而成個董氏家族就更肥仔，佢哋夾埋揸住三億八千萬股，收息收三億幾，而呢批貨，按照噚日市價計（每股三十七個八），價值一百四十五億港銀。咁嘅身家何苦日日七十一咁辛苦呢，返屋企湊吓孫咪好囉。
噚日記者會上，八方問東方海外經理沈志澄近來生意點？有冇炒人魷魚？沈經理答話冇乜炒人，重請多咗成百人做IT㖭，公司高層亦冇變動（董生都講過，唔會返東方海外），但約佢做訪問佢就耍晒手，梗係啦今時唔同往日，重有乜好講。
傳真︰2623-9278
電郵︰[email protected]