你冇睇錯！一直穿24號港隊球衣，效力晨曦嘅潘文迪，佢竟然變節效力日本隊倒戈打港隊！其實講緊嘅係Game迷期待已久嘅《WE9》；嚟到第9集，無論畫面、球員動作，都比前作仔細及靚咗；不過，最爆係終於加入港隊資料，除咗潘文迪，就連大家熟識嘅「鋼龍」范俊業等香港球星都會在Game內出現。今次特別邀請潘文迪親身「試踢」，用日本隊VS港隊激鬥一場，絕對史無前例！
記者：陳國輝 攝影：陳陶鈞、陳智良
聽到《WE9》加入埋香港隊，好多人一定好恨揀佢嚟用。查實佢只會喺「NIPPONCHALLENGE~Gofor2006！」模式入面出現！喺呢個故事Mode，玩家必須選用日本隊，然後逐步逐步，由外圍賽慢慢殺入2006德國世界盃決賽周。即係話，除咗日本隊，玩家就唔能夠揀其他隊用；至於新增嘅港隊，雖然冇得用，但會成為敵對球隊在比賽中出現。《WE》迷如果想同佢哋打一場漂漂亮亮嘅仗，不妨將香港與日本隊編入同一組，咁大家就會好快碰頭！
超技術！中場玩腳內檔
《WE》嘅射波招式，不嬲最多最齊，但係數嚟數去始終都少咗一樣，就係腳內檔！真實比賽入面，潘文迪話呢種技巧唔係咁容易練成，一來射門角度難控制，二來唔使拉弓，個波會冇乜力。不過，若然你練得純熟，腳內檔就係破網贏波嘅關鍵！《WE9》特別加入呢一招，當球員能力值有所不及，但係又夾硬用腳內檔，最終可能連門框都射唔中！但係，如果揀啱合適對象，好似施丹、朗拿度或者碧咸之類嘅技術型球員，由佢地用腳內檔射門就會準繩好多！甚至乎試過企喺中圈附近，大腳射向龍門都中框，吼實守門員行出禁區嗰陣用就最啱！
玩唔厭！聯賽育成模式
從上幾集起，《WE》已經加入咗MasterLeauge模式，而今集仍然會加強呢方面嘅真實性，如果想成為聯賽冠軍，玩家唔單止要有熟練嘅射門技術，同時重要識得做領隊，行軍遣將，可謂文武兼備！喺練習模式，《WE9》將上一集嘅五種項目，增至十多種，其中最特別係加入咗守門員訓練。好明顯，玩家喺今集唔係齋進攻咁簡單，重要識得防守！另外，玩家可選擇用原創球員或者自創球員比賽，要留意，球員嘅能力值會因應年紀、疏於練習或者欠狀態而下滑，如果原創球員不幸退役，新嘅同名球員就會誕生，至於喺邊一間球會出現，咁就要自己發掘喇！
遊戲名稱：《WORLDSOCCERWINNINGELEVEN9》
售價：$428
對應機種：PS2
開發公司：KONAMI
遊戲類型：足球
發售日期：8月4日
(c)2005KONAMI
查詢：龍勇（22468113）
玩家激評《WE9》！
畫面勁升級
從PS年代已玩《WE》，今集畫面靚咗，操作更多元化。另外，我亦好鍾意玩日本隊故事模式，皆因夠創意，而且重有機會遇上港隊㖭！但如果港隊嘅造型再細緻啲，咁就更Perfect！
個波彈咗
《WE9》真係好Pro，連足球都可自選adidas橙色專用球或PeliasII。因為個波輕咗，所以射龍力度亦有所改變，特別頭槌攻門，球速快咗，重經常喺守門員前面彈地，整體真實咗！
新進攻模式
今集可設置多兩個新位置「Wingback」及「SecondSignal」，前者類似巴西卡路士，進可攻，退可守；後者主要負責二傳功夫，協助射手入波，呢兩個位置都大大強化進攻意識！
好想阿叔做球評
球場數目增加咗，例如Mestalla、Riazor同埋NewlandsStadium等；今集新加入日本著名嘅評述員中西哲生及JonKabira等，如果下一集多埋「阿叔」同埋伍晃榮做評述就更好喇！
