美股隔晚下跌，港股低開，恒指跌過146點，但炒家冇有怕，埋單只跌60點。
滙控（005）噸位最重，拖低恒指14點。滙控輕輕跌40仙，10隻死火榜上，滙控C輪就佔5隻。佢哋係3886、3683、3541、3682、4558，跌幅由大至細，52%至19%。
滙控C輪3682：上便嗰5隻死火C輪，交投最活嘅係3682，收6.8仙，散22%。有82球易手，重有唔少人喺度玩死亡遊戲。
3682下月1日夠鐘，最後買賣係本月26日，即剩番15個交易日「炒」。滙控現價127.50元，本月17日除息1.09元，即理論除息價126.41元，同隻輪行使價130元相比，距離3.59元。3個幾星期內，滙控冇3.59元以上嘅升幅，隻輪就係咁先。
其他4隻死火C輪，最遠個隻都係去到9月初。3886行使價133元，3683行使價134元，3541行使價135元。呢3件末日輪，隻隻凍過水，應該講凍過冰。
滙控C輪4558：5隻死火輪中，4558係生存機會比較大嘅1隻。隻輪下月8日夠鐘，下月2日最後買賣，有22個交易日交易，行使價128.88元，冇咁價外。
炒時日無多嘅窩輪，無論係C或者P，如果重有幾個巴仙溢價，最好打定輸數。淨係當正股間唔中跌三幾格之時，啲末日輪就會插水。當然，賭呢啲輪嘅會話，輸晒都係幾個仙，但明知凍過水都去賭？不如將啲錢做慈善好過。
章盛