昨日講起英國富豪LordSainsbury話過捐盡家財，因篇幅所限，冇再講落去。英國最大嘅連鎖超級市場Sainsbury由同名家族擁有，呢個家族出過三位勳爵，一位係AlanSainsbury（1902-1998），生前係男爵。第二位係JohnSainsbury，亦係男爵，生於一九二七年，牛津大學畢業，屬保守黨；佢位細佬SirTimothy，係前保守黨議員；佢嘅堂細佬David（1940-）曾係社會民主黨員，更係該黨財神，後因社民黨不成氣候，轉投工黨，捐款幾百萬鎊，一九九七年工黨上台，David獲封為終身勳爵，佢就係我哋要講嘅大善長。
呢位Sainsbury勳爵自二十七歲起就做善事，成立一個「GatsbyCharitableFoundation」，周圍捐錢，由治療精神病至支援非洲，乜都有，既有此歷史，曾獲頒美國AndrewCarnegieMedalofPhilanthropy，攞過呢個獎嘅名人有蓋茨、端納（CNN創辦人）與索羅斯。不久之前，唔記得《金融時報》還是《經濟學人》報道，Ｓ勳爵話想在死前將佢名下嘅家產捐晒，大部份捐畀啲基金與大學，但佢有一個限制，就係啲錢一定要盡快用完，唔好成立一啲類似美國嘅基金（如福特基金會），得到十幾億鎊做基金，交畀專業投資基金經理去管，每年利用孳息嚟做善事。佢認為呢類基金會嘅最大得益者只會係基金會職員（得永久飯碗）與投資基金經理！
Ｓ勳爵點解會有此思想，可能同佢出身劍橋，思想略為左傾有關，佢經常爭取女性權益，加入社民黨後轉工黨，都與名門家族加入保守黨嘅傳統有異。
順帶一提，Ｓ勳爵二十七歲成立基金，名為Gatsby，係源於大作家F.ScottFitzgerald嘅著名小說《TheGreatGatsby》（中文好似叫做《大亨小傳》）。Gatsby係美國社會中有財有勢、享受奢華大亨嘅代名詞，辦一個慈善基金而稱之為Gatsby，內有深意。