早前唐英年爸爸唐翔千忽然叫唐唐返屋企幫手做生意，令人猜想唐唐會退出選特首嘅遊戲。
剛啱自由黨主席田少噚日請飲茶，八方就追問佢有冇同呢位前黨友傾過？點知田少忽然發呆，話有啲嘢唔記得同記者講，就係吳光正拜託佢向傳媒，澄清佢○七年一定冇興趣再參選特首。至於理由，Peter（吳光正英文名）就冇同田少講喎。
唔選○七，可以選二○一二啫，田少話更加唔會啦。原來吳光正覺得啲傳媒始終唔信佢唔再選，重成日追問佢，所以請好友田少代出頭。
至於Henry唐唐嘅去向，因為冇傾過，田少都唔知佢想點。田少今日會同班波友去深圳西麗打高球、鋤吓D，問佢係咪同Peter去，佢就唔答，睇怕都係喇。
賭王何鴻燊聽吳光正話唔選，竟然大讚佢話，「Peter好叻仔，又醒目，知道冇乜機會咪就識做。」至於○七年有冇人選，佢就話唔使急，但係佢估都係會繼續由煲呔做。
傳真︰2623-9278
電郵︰[email protected]