李蘢怡（Tiffany）前晚深夜俾本報影到佢煲煙兼帶四眼男伴返屋企，噚日佢喺灣仔泰拳健身中心以客串形式拍攝無綫劇集《窈窕熟女》，有備而戰嘅Tiffany解釋話佢只係返屋企傾公事，絕對唔係𠝹仔，而且重有其他人一齊上佢屋企喎。不過本報記者就淨係見到佢兩個返屋企，完全冇其他人，Tiffany嘅解釋似乎牽強咗啲。
拒絕戒煙
原來嗰位四眼哥哥係陳奕迅嘅前助手，亦即係Tiffany唱片監製胡波，Tiffany話：「其實文迪（其經理人）同梁浩賢都喺我屋企，我嚟緊會同梁浩賢合唱，佢哋知道我第二日一早要開工，去我屋企係等我可以落咗妝慢慢傾。間屋係媽咪買，不過唔係寫我個名。」
講到Tiffany唔顧形象周街煲煙，佢就知衰咁話：「有時諗嘢咪食一、兩支囉，我都懶得兜啦！以後唔會喺公眾場合食煙，因為已經俾公司轟炸咗一輪。我𠵱家都有人追，但係要專心做嘢，唔得閒畀啲仔煩。」我馮仁昭都好希望Tiffany真係知錯啦！
