灣仔區區議會主席黃英琦果然言出必行，前日帶同兩位英國專家同肥平、市建局林中麟密斟，傾吓係咪將灣仔修頓球場翻新，用英國規劃專家嘅創新建議，將四個籃球場升去兩層樓高，然後喺下面搞公園、休憩場地、運動場同埋夜市。Ada同八方講，肥平好想成事，但問題係以政府工程一貫嘅優先次序，翻新修頓一定唔會排先，真係要諗諗辦法。
佢重話，林中麟都幾鍾意個新設計，肥平話佢會諗吓可唔可以從社區地標同公共藝術方面，睇吓可唔可以班啲資源嚟做。雖然肥平唔係講得好確定，但總算係冇閂埋門，遲啲都肯同佢繼續傾。
八方知道Ada好緊張個改建計劃，因為兩位專家好認真，頭尾嚟咗四次，上個星期六喺大風大雨之下做公開諮詢，全部在場嘅市民都舉手贊成。Ada覺得今次係第一次由下而上嘅舉動，好值得珍惜，希望啲企業回饋社會，出錢出力。
傳真︰2623-9278
電郵︰[email protected]