電影《阿嫂》噚日喺香港正式上映，本來諗住內地同步上映《阿嫂傳奇》，但係因為套戲內容涉及黑社會，所以重未通過內地電影局嘅複審，要暫時取消上映計劃。前日朝早內地嘅戲院收到《阿》片發行公司嘅緊急通知，話套戲因為「洗印素材出現問題」，所以放映時間要另行通知。
獨撐優先場
之前同樣由黃精甫執導嘅《江湖》，因為題材涉及黑社會而俾內地電影局「槍斃」，不過馮仁昭收到風，《阿》片喺內地上映件事，暫時重未判死刑嘅，電影公司𠵱家同電影局爭取緊，呢兩日應該可以有結果，星皓電影就話因為套戲重喺複審階段，所以暫時未可以回應住。
此外，劉心悠噚日單拖出席《阿嫂》喺銅鑼灣紐約戲院舉行嘅優先場，同三位幸運觀眾合照，佢話第一次睇自己套戲，覺得好緊張，但對套戲就好有信心，重話覺得自己嘅廣東話講唔正，要多加訓練，覺得將來重有好大嘅空間畀自己發揮喎。